سەركەوتنی راستەقینە چییە؟

نوسراوە لە لایەن رەسووڵ سوڵتانی. بڵاوکراوەتەوە لە بلۆگ

سەركەوتنی راستەقینە چییە؟

لێمان روون و ئاشكرایە، كە هەموو كەسێك شێلگیرانە و ماندوو نەناسانە هەوڵ دەدات سەركەوێت و بە ئامانجەكەی خۆی بگات، بەڵام زۆربەی خەڵك ناگەنە مەبەست و ئامانجەكەی خۆیان. تۆ بڵێی رەوگە و رێگاكەیان خراپ و بەهەڵە هەڵبژاردبێ؟
مەبەست و ئامانجێكی روونیان نەبووە؟
تواناكانی خۆیانیان نەناسیوە؟

ئاخۆ لە نیوەی رێگا بۆیان دەركەوتووە، كە ئەو ئامانجەی كەوتوونەتە شوێنی، هیچ بەختەوەرییەكی پێوە نییە؟
باشە بۆچی هەندێ كەس دوای گەیشتن بە ئامانجەكانیشیان هەر ناقایل و ناڕازین؟ تۆ بڵێی پێوەرێكی هەڵەیان بووبێت؟ بۆچی دوای ئەوەی دەگەنە بەرزترین ئاست و پلە و پایەش، هەروا ناقایلن؟ بۆچی خۆشی و شادییەكانیان كەمخایەن و تیژتێپەڕن؟ بۆچی هێشتا چێژیان لە سەركەوتنەكەیان وەرنەگرتووە، بە شوێن ئامانجێكی دیكەوەن؟ ئەوانە چییان لە ژیان دەوێ، كە سەرەڕای هەوڵی بێسنووریشیان هەرگیز رازی نین؟
لێرەدا دەمانەوێ پێتان بڵێین چۆن مەبەست و ئامانجەكەتان دەسنیشان بكەن و رێگاكانی گەیشتن بەو ئامانجانەتان چۆن رێك و لەبار بكەنەوە!

دەسنیشانكردنی ئامانج

مرۆڤی بێ ئامانج و مەبەست، تەواو خۆی دەداتە دەست رووداو و پێشهاتەكان. ئەو كەسەی لە ژیانیدا ئامانجێكی روونی هەیە، دوای سەركەوتن، خۆی بە بەختەوەر دەزانێ و لە ناخەوە هێمن دەبێتەوە و دەحەسێتەوە. بەڵام ئەوانەی ئامانجەكانیان ناڕوون و نادیارن، بگەنە هەر ئاست و پلە و پایەیەك، دیسانیش هەر ناقایل و ناڕازین. هەر كام لە ئێمە دەبێ لێمان روون بێ، چیمان دەوێ؟ بە شوێن چ مەبەست و ئامانجێكەوەین؟ و چ سەركەوتنێكمان دەوێ.

لەوانەیە ئامانجی ئێمە ئەوە بێ لە خوێندنی زانكۆدا سەركەوتوو بین و لەوانەیە سەركەوتن لە زەماوەند(ژیانی هاوبەش و كار و پەروەردەكردنی رۆح و جەستە)شمان مەبەست بێ و بمانەوێ ئارەزووە كۆمەڵایەتی و تاكەكەسیەكانیشمان رێك بخەین و وەدییان بێنین. هەرچۆنێك بێ، ناسین و دەسنیشانكردنی ئامانجەكەمان، پێشمەرجی هەرچەشنە هەنگاوێكە. جگە لەوەش، دەبێ خۆ ببوێرین لەوەی بەچاولێكەری وەشوێن ئامانجێك بكەوین. بۆ وێنە، ئەگەر بمانەوێ ببینە ئەندازیاری بەشی كارەبا، هەر لەبەر ئەوەی كوڕە مامەكەمان بووەتە ئەندازیار و پێی دەوڵەمەند بووە، ئاخۆ دوای سەركەوتن دڵمان خۆش دەبێ؟ ئەگەر خاڵۆمان پەلەوەر بەخێو دەكات و پێی دەوڵەمەند بووە، ئاخۆ ئێمەش دەبێ ئەو كارە پڕ لە قازانجە هەڵبژێرین؟ یان ئەگەر مەسعوودی هاوپۆلمان بووەتە وەرزشكار و هەموو رۆژێ ناوی لە رۆژنامەكاندایە، ئێمەش دەبێ وەك ئەو ببینە وەرزشكار.

ئەگەر خۆمان بێنینە ریزی خەڵك و خۆمان لەگەڵ ئەوانی دیكەدا بەراورد بكەین، دوو هەڵەی گەورە دەكەین:

  • بەبێ ئەوەی بزانین، دەكەوینە پێشبڕكێ لەگەڵ خەڵكی دیكە، چونكە ئامانجی ئێمە بەدیهێنانی ویست و داخوازیەكی دیاریكراو نییە، بەڵكو "خۆهەڵكێشان" یان "خۆ وەك یەكێكی دیكە لێكردنە".
  • بەبێ ئەوەی توانا و هێزی خۆمان بناسین، دەبینە پاشكۆی خەڵكی دیكە و شوێنیان دەكەوین.

به‌ گشتی ده‌بێ ئێمه‌ به‌شوێن ئه‌و شتانه‌دا بڕۆین که‌ خۆمان له‌ ناخه‌وه‌ حه‌زمان لێیه‌تی و بووه‌ته‌ خه‌ونی شه‌و و رۆژمان، ئیتر ئه‌و کاته‌یه‌ هه‌موو هێز و توانامانی بۆ ته‌رخان ده‌که‌ین و له‌و حاڵه‌ته‌دا به‌ دلنیاییه‌وه‌ بۆی ماندوو ده‌بین و لێی ماندوو نابین.

ئەو دوو هەڵەیە، دەرەنجامی زۆر خراپی لێ دەكەوێتەوە. ئەی چ بكەین؟ دەبێ بەر لە هەموو شتێك، ئامانجەكەی خۆمان باشتر بناسین و ئینجا قۆڵی لێ هەڵماڵین.


ئامادەکردنی: رەسووڵ سوڵتانی


مافی لەبەرگرتنەوەی پارێزراوە © ٢٠١٢